Жогорку Кеңештин "Ата Журт-Кыргызстан" фракциясынан депутаты Мейкинбек Абдалиев мандатынан ажыратылды. Чечимди Борбордук шайлоо комиссиясы бүгүнкү жыйынында кабыл алган. Абдалиев депутаттыктан өз ыктыяры менен баш тартып арыз жазганы белгилүү болду. Анын ордуна тизме боюнча Арсланбек Эгембердиев эл өкүлү болуп келмекчи. Мейкинбек Абдалиев 1976-жылы 11-февралда Жалал-Абад облусунун Ноокен районунун Масы айылында туулган.
Кыргызстанда 12 жылдык билим берүүгө өтүүнүн алкагында окуучулардын билимин баалоо системасы өзгөрүлмөкчү. Концепциянын долбооруна көз салсак, беш баллдык система 10 балл менен алмашып, балдардын билимин өзүнчө карап баалоого мүмкүнчүлүк берери айтылууда. Биринчи, экинчи класстарда баа коюлбайт, тагыраагы, окуучуларды баалоо сандык эмес, сапаттык мүнөздө жүргүзүлөт. Баштапкы класста балдардын окуу жана өнүгүү жыйынтыктары алтынчы класстын аягында негизги сабактар боюнча жыйынтыктоочу аттестация менен бааланат. Бул тесттик текшерүү окуучулардын окуу, жазуу, математика жана табигый илимдер боюнча базалык сабаттуулугун баалоого багытталган. Орто мектептин деңгээлинде окуучулардын жетишкендиктери 8-класстан кийин белгилүү бир сабактарга же билим берүү тармактарга/ предметтерге кызыгуусун жана жөндөмүн аныктоо максатында бааланат.
Россия Кыргызстанды билим берүү жаатында дайым колдоого алат. Бул тууралуу Россия президентинин аймактар аралык жана маданий байланыштар боюнча башкармалыгынын жетекчисинин орун басары Антон Рыбаков Кыргыз-Россия билим берүү жарманкесинде билдирди. "Жарманкенин катышуучуларына ыраазычылык билдирем, биз бул жакка билим берүүдөгү мыкты саамалыктарыбызды алып келдик. Кызыгуу туудурат деп үмүт артабыз. Россия Кыгызстанды дайым колдойт, өлкөнүн билим берүү тармагында ири өзгөрүүлөр болуп жатканын байкап келебиз", — деди Рыбаков. Ал ошондой эле Ысык-Көлдө өтүп жаткан иш-чаранын алкагында Россиянын алдыңкы окуу жайларынын өкүлдөрү катышкан 130га чукул лекция, семинарлар, мастер-класстар пландаштырылганын белгиледи. Рыбаков өз сөзүндө 2030-жылга чейин КРСУнун жаңы кампусун ишке берүү мерчемделип жатканын кошумчалады. Анын айтымында, курулуш окуу жайдын бейнесин өзгөртүп, билим берүү рыногунда алдыңкы сапка чыгарат.
Жо Байдендин президенттигинин тушунда АКШ бюджетинин дефицити 6,6 триллион долларга жетип, байкоо жүргүзүлүп келе жаткан мезгилдеги эң жогорку көрсөткүч катталда. Бул туурауу РИА Новости америкалык Финансы министрлигинин маалыматына таянуу менен жазды. Байден башкарып тургандагы 3,5 жылдын ичинде америка өкмөтүнүн чыгашасы кирешеден 6,6 триллион долларга ашып түшкөн. Бул статистика жүргүзүлө баштагандан берки эң жогорку чек. Байденден мурунку президент Дональд Трамп дефицитти 5,6 триллион долларга жеткирип кызматынан кеткен. Барак Обама бул жүз жылдыкта президенттигинин жыйынтыгы менен АКШ бюджетинин дефицитин Жорж Буш калтырып кеткен 5,1 триллиондон 2,2 триллионго түшүргөн жалгыз өлкө башчы болуп калды. Ал эми Буш 2001-жылдын жыйынтыгы менен АКШ бюджети жылдык профицитти 130 миллиард доллар кылып калтырып кеткен президент болду.