БИШКЕК, 16-авг. — Sputnik. Баткенде 54 жаштагы майып кызы менен ар кайсы үйдө баш калкалап жүргөн 90 жаштагы эне үйлүү болду. Бул тууралуу облустук өкүлчүлүктөн билдиришти.
Маалыматка ылайык, эки ай мурда үйдүн курулушун Баткен облусунун жетекчилери колго алган.
"90 жаштагы Ташбүбү Абилова 54 жаштагы ден соолугунун мүмкүнчүлүгү чектелген кызы Тажигүл Абилова менен туруктуу жашаган жайы жок, айылдагы бош үйлөрдө баш калкалап келген. Эненин жашоо шарты тууралуу маалыматтар социалдык тармактарда жарыяланып, жергиликтүү бийликке да маалым болгон", — деп айтылат кабарда.
Үй куруу үчүн Алты-Адыр айылынан 10 сотых жер тилке бөлүнүп, облустагы мекеме жетекчилеринин колдоосу менен үч бөлмөлүү бардык шарты бар үй курулган. Ошондой эле үйгө турмуш-тиричиликке керектүү буюмдар алынган.