БИШКЕК, 14-авг. — Sputnik. Экономист Нургүл Акимова Кыргызстан ЕАЭБге киргенден бери өлкөнүн инвестициялык дарамети жогорулаганын Sputnik Кыргызстан радиосуна берген маегинде билдирди.
"Биримдиктин 180 миллиондук рыногуна чыккысы келген өлкөлөр соңку маалда Кыргызстанга келип жайгашууда. Ага мисал катары жакында эле ачылган кыргыз-өзбек автозаводун айтсак болот. Эгерде ЕАЭБге кирбеген Өзбекстан даяр продукциясын Кыргызстанга же Кыргызстан аркылуу башка жакка экспорттосо, анда көбүрөөк бажы салыгын төлөмөк. Албетте, ал баага да таасир этип, өзбекстандык автоунаалар кымбат болмок. Мындан тышкары, бирдиктүү экономикалык аймак болгон ЕАЭБ өлкөлөрүнүн рыногу Кыргызстан үчүн чоң пайда алып келет. Өлкө эл аралык сооданы өзүнүн аймагында жүргүзүүдө деп айтсак болот", — деп белгилеген адис.
Ал ошондой эле биримдиктин башка өлкөлөрүнүн рыногуна чыгуудагы тоскоолдуктар азайганын белгиледи.
"Товар жүгүртүүнүн көлөмү республика экономикалык биримдикке мүчө болгонунан улам өстү. Кытайдан он жыл мурун алган товардын көлөмү менен учурдагы сандарды салыштырсак, үч эселеген өсүштү көрөбүз. Эмнеге? Анткени мурда даяр товарды өзүбүзгө жана реэкспортко алчубуз, азыр болсо өзүбүз жана ЕАЭБ өлкөлөрү үчүн алып жатабыз", — деди Акимова.
Экономист Кытайдан даяр продукциядан тышкары тетиктер дагы, мисалы, фурнитура алып келинерин кошумчалаган.
"Муну менен Кыргызстан өзүнүн товарын өндүрүүдө. Тагыраагы, кыргызстандыктар ортодо иштеп, пайда таап жатат", — деп түшүндүрдү адис.