БИШКЕК, 1-авг. — Sputnik. Кытай — Кыргызстан — Өзбекстан темир жолу өлкөнү транспорттук туңгуюктан чыгарат. Бул тууралуу мамлекет башчы Садыр Жапаровдун Кыргыз темир жолунун түзүлгөндүгүнүн 100 жылдык мааракеси менен куттуктоосунда айтылат.
Президент аталган тармак чыгашалуу болуп, жарым миллиард сомдон ашуун карызга батканын белгилеген. Анын айтымында, темир жол тармагын өнүктүрүү жаатында реформалар жүргүзүлүүдө.
"Советтер Союзунан 424,6 чакырым темир жолду мурастап калганбыз. Эгемендик жылдарында бир метр дагы темир жол курулган эмес. Мамлекетке бул тармакты өнүктүрүүнүн маанилүү жана зарыл экенин түшүнүп, 2022-жылдан баштап улуттук экономиканы өнүктүрүү үчүн зор стратегиялык мааниге ээ, амбициялуу долбоорлорду ишке ашырууга кириштик. Анын ичинде кыргыз темир жолунун транзиттик потенциалын кеңейтүү пландалууда", — деген Жапаров.
Президент эки жыл мурда башталган Балыкчы — Кочкор — Кара-Кече — Макмал долбоору илгерилеп, учурда 43 чакырым жол курулганына токтолду. Бул жол Кытай — Кыргызстан — Өзбекстан темир жолу менен байланышып, өлкө ичинде бирдиктүү темир жол тармагын түзүүдө негизги ролду ойной турганын белгиледи.
"Түндүгүбүз менен түштүгүбүз темир жол аркылуу байланышып, өлкө ичинде оор жүктөр, жүргүнчүлөр поезд менен ташылат. Бул көптөгөн чыгымды сарамжалдоого жол ачат. Ал эми Кытай — Кыргызстан — Өзбекстан темир жолу Кыргызстанды транспорттук туңгуюктан алып чыгып, төрт миллиардга жакын адамды байланыштырат. Азиядан Түркия аркылуу Европага, Жакынкы Чыгышка, Перс булуңундагы өлкөлөргө жана Түндүк Африкага чейин жүк ташуулардын географиясын кеңейтет", — деген мамлекет башчы.
Соңунда президент темир жолчуларга чың ден соолук, кажыбас кайрат, жаңычыл аракет жана бакубат турмуш каалаган.