БИШКЕК, 28-июл. — Sputnik. Кургатылган жана ышталган балыкты көп жегендик ден соолукка кандай зыян алып келерин "Живая еда" программасынын алып баруучусу Сергей Малоземов Sputnik радиосуна курган маегинде айтып берди.
Ал белгилегендей, мындай балыктар туздуу болот.
"Анын 10 пайызын туз түзөт. Кургатылган же ышталган кичинекей эки балык туздун күнүмдүк дозасын камсыздап коет. Күн сайын жей бергенде гипертония коркунучу жаралат. Адам кан басымы көтөрүлгөн тейде жүрсө инсульт алышы ыктымал", – деп белгилеген Сергей Малоземов.
Анын айтымында, кургатылган же ышталган балыкты сыра менен айкалыштыруу организмге эки эсе зыян.
"Организмге бир эле учурда туз менен суюктук барат. Туз суюктуктун тез айлануусун шарттап, басым эки эсе жогорулайт. Бул абалды күндө кайталай берген адам атайылап эле инсультту чакырып жаткандай болот", – деген ал.
Адис кургатылган, ышталган балыктар олуттуу зыян алып келбеши үчүн аны жашылчалар менен жеген туура экенин белгилеген.
"Мисалы, кайнатылган картошкада калий көп, кургатылган же ышталган балыкты картошка менен жегенде андагы туз бир аз болсо да нейтралдашат. Калий туздагы ашыкча натрийге антидот катары иштейт", – деп түшүндүргөн эксперт.
Малоземов ден соолугунда көйгөйү жок адамдар мындай балыктарды аптасына бир-эки ирет аз өлчөмдө жесе саламаттыкка терс таасирин тийгизбей турганын кошумчалаган.