БИШКЕК, 17-июл. — Sputnik. Алымкадыр Бейшеналиев олимпиадалык курамдын дарыгерлерине медициналык баштыктарды тапшырды. Бул тууралуу Саламаттык сактоо министрлигинен билдиришти.
© Фото / пресс-служба Минздрава КР
Маалыматка ылайык, министр спортчулардын Париж Олимпиадасынын алдындагы жыйынтыктоочу машыгуусуна барып, спортчулар жана олимпиадалык курама команданын дарыгерлери менен жолугушкан.
"Башкы дарыгер Сагындык Айтбаев жетектеген спорттук-реабилитациялык борбордун дарыгерлери өз убагында жардам көрсөтүү үчүн бардык керектүү нерселер менен жабдылган медициналык баштыктарды алышты", — деп айтылат маалыматта.
Бейшеналиев спортчулар үчүн туура тамактануунун маанилүүлүгүн белгилеп, медиктерге олимпиадачылардын тамак-ашына көз салууну тапшырган.
Белгилей кетсек, жайкы Олимпиада оюндары Франциянын борборунда 26-июлдан 11-августка чейин өтөт. Анда Кыргызстандын намысын 16 спортчу коргойт.