БИШКЕК, 1-июл. — Sputnik. "Кызыл-Кыя көмүр" акционердик коому көпүрөнү көтөрбөгөндө Ноокаттагы сел мынчалык күчтүү болмок эмес. Бул тууралуу министрлер кабинетинин төрагасы Акылбек Жапаров Ош облусунун оперативдүү штабынын жыйынында билдирди.
Анын айтымында, суу көпүрөнүн алдында топтолуп, натыйжада ылдый жагына күчтүү агымдагы сел келген.
"Кызыл-Кыя көмүр" акционердик коому көпүрөнүн баарын көтөрүп, ошол жерлерге суу топтолгон. Натыйжада суу аябай күчтүү агым менен ылдый жакты каптаган. Жанагы кишилер кууш жерге кептелип калган да. Аябай чоң массадагы суу келген. Эгерде ошол "Кызыл-Кыя көмүр" көпүрөнү көтөрүп койбогондо суу үстүнөн агып кете бермек. Мына ошол кууш жерге суу топтолуп келип, 10го жакын кишиден ажырап жатабыз. Бир шылуундун айынан... Кырсыкты алдын алууга мүмкүн болмок", — деди Жапаров.
Ошондой эле ал транспорт жана коммуникациялар министри Тилек Текебаев чоң ката кетиргенин айтып, долбоорлоочуну таап чыгууну тапшырды. Мындан тышкары, минкаб башчысы селди алдын алууга мүмкүндүк болгонун, жергиликтүү бийлик ал үчүн жетиштүү аракет кылбаганын белгиледи.
28-июнда Ноокат районунда сел жүргөн. Аймакта өзгөчө кырдаал жарыяланды. Абшыр-Ата капчыгайында жолду сел алып, 1300 адам эс алуу жайында калган. Алардын бардыгы эвакуацияланган. Өзгөчө кырдаалдар министрлигинин маалыматы боюнча, жаратылыш кырсыгынан 9 адам каза болду.