БИШКЕК, 23-июн. — Sputnik. Кыздардын кулагын өтө эрте куракта көзөө анын ден соолугуна кооптуулук жаратышы мүмкүн. Бул тууралуу педиатр Андрей Продеус Sputnik радиосуна курган маегинде айтып берди.
Адис бала канчалык кичинекей болсо, теринин сезгенүү коркунучу ошончолук чоң экенине токтолгон.
"Кулакты жети жаштан кийин көзөгөн туура. Андан кичүү кезде балдар бул эмне процесс экенин түшүнүшпөйт, мындан тышкары, көзөлгөн жерине инфекция кирип ириңдеп кетиши мүмкүн. Балага жаңы көзөлгөн жерди кармалаба деп түшүндүргөн менен ал бул эрежени сактабайт. Ойноп жатып капыстан сөйкөсүн бир нерсеге илип кетип кулагынын аягына чейин жырып алышы да ыктымал", – деп белгилеген Андрей Продеус.
Педиатр кыздардын кулагын эрте көзөө айрым учурда бул органдын ички бөлүктөрүнө да таасир бериши мүмкүндүгүн эскерткен. Ошондой эле кичинекейлердин денесинде сөйкөгө аллергия болушу да ыктымал. Дарыгер алгачкы сөйкө сапаттуу алтындан болушу шарт деп белгилейт. Кулакты анын анатомиясын, ага кошо акупунктура чекиттерин билген адистер жасашы шарт экенин айтып, процедурада бардык санитардык нормаларды эске алууга чакырган. Эгерде ата-эне кандайдыр бир себеп менен наристенин кулагын көзөтсө ал жерди карап, инфекция кирип жара болбой бүтүшүн көзөмөлдөө зарылдыгын кошумчалаган.