БИШКЕК, 21-июн. — Sputnik. Чүйдө кубаттуулугу эки мегаватт болгон Ысык-Ата-1 кичи ГЭСи ишке берилди. Бул тууралуу өкмөттүн маалымат кызматынан кабарлашты.
Билдирүүгө ылайык, анын ачылышына Чүйдү жумушчу сапары менен кыдырып жүргөн Акылбек Жапаров катышкан.
"Бул кичи ГЭСтин ишке кириши менен президенттин жарлыгын ишке ашыруудабыз. Кара-Кыргыз автономиялуу облусунун 100 жылдыгына карата 100 ишкана, анын ичинде бул кичи ГЭС ачылат. Жакынкы жылдарда биздин өлкөдө ондогон гидроэлектростанциялар, күн жана шамал станциялары курулат. Кылымдын курулушу — Камбар-Ата-1 ГЭСи, Кытай — Кыргызстан — Өзбекстан темир жолунун курулушу да башталат. Ал Шанхайдан Парижге чейинки эң кыска жол болот", — деди ал.
Жапаров кичи ГЭСтин ачылышы мамлекеттин энергетикалык инфраструктурасын жакшыртууга багытталган аракет экенин белгиледи.