БИШКЕК, 14-июн. — Sputnik. Пентагондун аудитору кайрадан АКШнын Украина үчүн деген курал-жарагы 1,9 миллиард долларга кымбат бааланганын аныктады. Бул тууралуу департаменттин башкы инспекторуна шилтеме берип РИА Новости жазды.
"Коргонуу беренелерин кароо учурунда курал-жарактардын баасы 1,9 миллиард долларга кымбат бааланганы ачыкталды. Бул сумма — мурда жарыяланган 6,2 миллиард доллардан тышкаркы каражат. Мындай нерсе министрлик менен анын структуралары генералдык инспектордун көрсөтмөсүнө ылайык саясатты толук ишке ашыра албаганын көрсөтүп турат", — деп жазылган көзөмөлдөөчү ведомствонун отчетунда.
Эске салсак, Украинага аскердик жардам көрсөтүү коррупцияга алып келип, андан улам иш козголуп камакка алынгандар болгон. Мисалга алсак, 2021-жылдын ноябрынан тарта америкалык жети аскер менен жай жарандардан турган подрядчылар Румыниядагы аба базасынан Украинага берилүүчү жардамдан баасы эки миллионго чукул жети тонна күйүүчү майды кымтыганы аныкталган.