БИШКЕК, 10-июн. — Sputnik. Франциянын президенти Эммануэль Макрон парламенттин төмөнкү палатасы — Улуттук жыйынды таратып, кезексиз шайлоо дайындоо боюнча кайрылуу жасады. Бул тууралуу РИА Новости жазды.
Маалыматка ылайык, кезексиз шайлоонун биринчи туру 30-июнга, экинчиси 7-июлга белгиленүүдө.
Төмөнкү палатага кезексиз шайлоо өткөрүү чакырыгы менен "Улуттук биригүү" партиясынын лидери Жордан Барделла чыккан. Анын партиясы Европарламентке шайлоодо эң көп добушту камсыздап жатат. Алдын ала жыйынтыктар жарыялангандан кийин ал жактоочуларына кайрылып, француздар Макрондун жана анын өкмөтүнүн саясатына каршы экенин белгиледи.
Парламенттеги "Улуттук биригүү" фракциясынын лидери Марин Ле Пен төмөнкү палатаны таратуу чечимин кубаттады. Ал анын партиясы бийликти колго алып, Францияны жандандырууга даяр экенин билдирди.
Оппозициялык оңчул партия, алдын ала жыйынтык боюнча 32 пайыз добушка ээ болгон. Ал эми Макрондун "Кайра жаралуу" партиясы 15,4 пайыз менен экинчи орунда.
Франциядан Европарламентке 81 депутат шайланат. "Улуттук биригүү" партиясынын башчысы Жордан Барделла Россиянын аймагына сокку уруу үчүн Украинага ракеталарды берүүгө каршы чыгып келет.