БИШКЕК, 2-июн. — Sputnik. Министрлер кабинетинин төрагасы Акылбек Жапаров 3-4-июнда иш сапар менен Беларуска бара турганын өкмөттөн маалымдашты.
Министрлер кабинетинин башчысы Евразия өкмөттөр аралык кеңешинин кезектеги жыйынына катышат. Мындан тышкары, "Евразия экономикалык биримдигинин азык-түлүк коопсуздугу" деп аталган пленардык сессияда жана "Белагро-2024" эл аралык адистештирилген көргөзмөсүндө да болмокчу.
Жыйындагы талкууда Евразия өнүктүрүү банкынын инвестициялык ишмердүүлүгүн жүзөгө ашыруу жолу менен ЕАЭБ мамлекеттеринин ортосунда соода-экономикалык байланыштарды кеңейтүү суроосу да бар. Ошондой эле рыноктордогу атаандаштыктын абалы, анын жалпы эрежелерин бузууларга бөгөт коюу жаатындагы көрүлүп жаткан чаралар тууралуу сөз болуп, ЕЭКтин өткөн жылдагы отчету берилет.