БИШКЕК, 24-май — Sputnik. ЕАЭБдин ресурстары уюмга мүчө мамлекеттердин азык-түлүк жана энергетикалык коопсуздугун камсыз кылууга мүмкүндүк берет. Бул тууралуу экономика жана коммерция министринин орун басары Назарбек Малаев билдирди.
Экономика жана коммерция министринин орун басары Назарбек Малаев
© Фото / Пресс-служба Министерства экономики и коммерции КР
Белгилей кетсек, учурда Бишкекте ЕАЭБ жөнүндө келишимдин 10 жылдыгына арналган илимий-практикалык конференция өтүп жатат.
Малаевдин айтымында, ЕАЭБ базасы бар эл аралык интеграциялык бирикме катары ишке ашты.
"Биримдик иштей баштагандан бери экономиканын бардык тармактарында интеграция тереңдеп, уюмда нормативдик база түзүлдү. ЕАЭБге мүчө мамлекеттердин социалдык-экономикалык абалы жакшырууда. Келишимди ишке ашыруу, анын ичинде биргелешкен экономикалык чараларды ишке ашыруу уюмдун дүйнөлүк чакырыктарга туруктуулугун камсыз кылат. Биримдиктин ресурстары уюмга мүчө мамлекеттердин азык-түлүк жана энергетикалык коопсуздугун камсыз кылууга мүмкүндүк берет", — деди Малаев.
Ошондой эле ал уюмдун алкагында бирдиктүү рынок иштеп, бажы көзөмөлү жоюлуп, ветеринардык, санитардык жана фитосанитардык көзөмөл алып салынганын белгиледи.
"Кыргызстан инфраструктуралык жана инвестициялык долбоорлор үчүн жабдууларды пошлинасыз ташып келүүдө жеңилдиктерге ээ болду. Ошондой эле ички рынокто өндүрүш жана керектөө үчүн зарыл болгон 166 товардык позиция импорттук бажы алымдарынан убактылуу бошотулду. Кыргызстан бажы төлөмдөрүн бөлүштүрүүдө жагымдуу шарттарга жетишти. Өлкөнүн үлүшү 1,9 пайызды түздү", — деди министрдин орун басары.
Мындан тышкары, ал бажы постторун, лабораторияларды жабдуу үчүн Россиядан 200 миллион долларга техникалык жардам көрсөтүлгөнүн айтып, өлкө экономикасын уюмга интеграциялоо үчүн 500 миллион доллар уставдык капиталы менен Кыргыз-Россия өнүктүрүү фонду түзүлгөнүн кошумчалады.