Өлкөдө дагы деле юриспруденция жана экономикалык багытта билим алгандар көп. ЖОЖдордун дээрлик баарында юридикалык факультети бар жана аларды жылына 800дөй студент-юрист бүтүрүп чыгат. Бул тууралуу Дүйшөн Батырбеков Sputnik Кыргызстан радиосуна маек куруп жатып билдирди.
Анын айтымында, кесипти туура тандоо адамды жашоосунан ырахат алып өмүр сүрүүгө жетелейт.
"Кесип тандоодо биз дагы деле эски түшүнүктөрдөн арыла албай келебиз. Юридиканы бүтүп бир жерде сот, прокурор болуп, үстөмдүк кылып жашоону балдарыбызга бакыт катары сүрөттөйбүз. Ошол эле убакытта бул багытта билим алгандын баарына эле мамлекеттик кызмат даяр турбаганын эске албайбыз. Биздин өлкө кичинекей, ар бир бүтүрүүчү мамлекеттик кызматта иштеп кала албайт. Конкурстук негизде тандалып, анын да өзүнүн түйшүгү болорун балдарга түшүндүрсөк. Андыктан, биринчиден, балага ошол кесип жагар-жакпасына олуттуу көңүл буруу зарыл. Ал — өзүнчө бир жекелик, адам. Сиздин каалооңуз эмес, өзүнүн жөндөмүнө жараша кесипке ээ болушу шарт. Экинчиден, ушул мамлекетте жашап кала турган болгон соң өзүбүзгө ылайыкташкан кесиптерге ээ болууга далалаттануу зарыл. Биз тоолуу өлкөбүз, медицина тармагында окуй турган болсо ушул багытта керектелүүчү адистиктерге басым жасаганыбыз туура. Болбосо агрардык кесиптер, мал чарбачылыгында эгемендүүлүк алгандан бери эле кадр тартышыгы жаралып келет. Айылда чоңойгон балдар көзү менен көрүп, билип жүргөн тармагына тапшырса окуп кетиши да, кесибин аркалашы да жеңил болот. Анткени бардык бүтүрүүчү эле шаарда жашап калбайт да. Жашоосун ошого ылайыкташтыры керек. Үчүнчүдөн, баланын дараметине караган туура. Эгер балаңыз мектепти ортозаар аяктаган болсо аны кыйнап жогорку билим алууга шыкактагандан эмне пайда? Азыр базарда отургандын ар бир үчүнчүсү жогорку билимдүү адис экенин айтат. Андан көрө колу менен жасап, акчаны жакшы тапкан электрик, механик, тигүүчү, ашпозчу сыяктуу кесиптерди аркалаганы жакшы эмеспи", — деди Батырбеков.
Педагог бүтүрүүчүлөрдү окуу жайдын аброюна эмес, ээ болчу кесиптин келечегине карап план түзүүгө чакырды.