БИШКЕК, 22-май — Sputnik. АКШда экс-президент Дональд Трамптын шайлоо алдында чыгарган видеосу, анда айтылган "бирдиктүү рейх" сөзү чуу жаратып жатат. Бул туурасында РИА Новости жазды.
Аптанын башында Трамптын Truth Social социалдык тармагындагы баракчасында "Американы мындан кийин эмне күтөт" деген шайлоочуларга багытталган видеосу чыгып, эгерде ал күзүндө жеңишке жетсе кандай өзгөрүүлөр болору туурасында баяндалган. Анда басылмалардын барактары, темалары пайдаланылган. Фрагменттердин биринен "Бирдиктүү рейхти түзүүдөн улам... өнөр жайда кадыресе өсүү болгон" деген жазуу турат.
Видеодогу бул жазуу ЖМКлар менен Ак үйдүн көзүнө түшүп, экс-президентти кескин сындоо жана "нацисттик" сөздөр үчүн күнөөлөө башталган.
"Рейх" термини Германияны 1933-1945-жылдары "үчүнчү рейхке" кошкон Адольф Гитлер жетектеген нацисттик Германия менен элестетилет", — деп белгилеген CNN.
Америкалык ири телеканалдардын бири болгон CNN "Трамп мурдараак да антисемиттик стереотиптерди колдонуп, анысы америкалык еврейлердин кескин сынына кабылганын", ал эми республикачылардын риторикасында "Гитлер колдонгон тил менен салыштырылгандыгын" жазды.
Ак үйдүн маалымат катчысы Карин Жан-Пьер өткөн шейшембидеги брифингде видеонун мазмуну туурасында АКШ президенти Жозеф Байденге маалымат берилгенин айткан.
"Адольф Гитлер учурундагы нацисттик Германияга байланыштуу контентти алып чыгуу — аңкоолук, жийиркеничтүү жана уят", — деп кошумчалаган ал.
Роликти чуудан кийин Трамптын баракчасынан эртеси эртең менен алып салышкан, ал эми шайлоо алдындагы штабдан экс-президент анын мазмунун билбегенин айтышкан.
"Репост кылган кызматкер сөздү көргөн эмес, ал эми экс-президент бул учурда сотто жүргөн", — деп айтылат штаб өкүлү Каролин Левиттин билдирүүсүндө.