БИШКЕК, 20-май — Sputnik. Иран президенти Эбрахим Раиси жана аны коштоп жүргөндөрдүн каза болгондугуна байланыштуу Иранда беш күндүк аза күтүү жарыяланды. Бул тууралуу өлкөнүн руханий лидери аятолла Али Хаменеи билдиргенин РИА Новости жазды.
"Беш күндүк аза күтүү жарыялайм жана Иран элине көңүл айтам", — деген Хаменеи.
Ал ошондой эле Конституциянын 131-беренесине ылайык, Мохаммад Мохбер аткаруу бийлигинин башчысы болуп, мыйзам чыгаруу жана сот бутактарынын башчылары менен жакынкы 50 күндүн ичинде жаңы президентти шайлоону макулдашууга милдеттүү экенин белгиледи.
Раиси жана аны коштоп жүргөндөрдү акыркы сапарга узатуу аземи шейшемби күнү, 21-майда, Тебриз шаарында болот. Бул тууралуу Чыгыш Азербайжан провинциясынын губернаторунун административдик, саясий жана шайлоо маселелери боюнча жооптуу кызматкери Хасан Хакикиян билдиргенин Tasnim агенттиги кабарлады.
Ирандын президенти Эбрахим Раиси, тышкы иштер министри Хосейн Амир Абдоллахиан жана башка расмий адамдар бара жаткан тик учак 19-майда өлкөнүн түндүк-батышындагы Верзеган аймагына кулап түшкөн. 20-май күнү эртең менен Ирандын вице-президенти Мохсен Мансури президент жана анын делегациясы тик учак кырсыгынан каза болду деген маалыматты тастыктады. Делегация Азербайжанга болгон сапарынан кийин кайтып келе жаткан. Анда Раиси жана анын азербайжандык кесиптеши Илхам Алиев Гиз Галасы ГЭСинин ачылыш аземине жана чек арадагы Аракс дарыясындагы Худаферин ГЭСин ишке киргизүү аземине катышкан.