БИШКЕК, 19-май — Sputnik. Кыргызстандын жана Пакистандын тышкы иштер министрлери 21-майда Астанада жолугат. Бул тууралуу ТИМден билдиришти.
Маалыматка ылайык, бүгүн тышкы иштер министринин орун басары Авазбек Атаханов Пакистандын элчиси Хасан Али Зайгамды кабыл алган.
Жолугушууда элчи Хасан Али Зайгам чет элдиктер аралашкан 18-майдагы окуя боюнча маалымат алууда көрсөткөн жардамы үчүн кыргыз тарапка ыраазычылык билдирди.
Министрдин орун басары окуя жөнгө салынып, кырдаал укук коргоо органдарынын толук көзөмөлүндө экенин, бардык тиешеси барларга карата иликтөө иштери жүрүп жатканын белгиледи.
"Тараптар 21-майда Астанада өтө турган ШКУнун саммитинде эки өлкөнүн ТИМ башчылары Жээнбек Кулубаев менен Мохаммад Исхак Дардын жолугушуусун уюштурууну макулдашты", — деп жазылат маалыматта.
Бүгүн эки өлкөнүн тышкы ведомстволорунун башчыларынын телефон аркылуу сүйлөшүүсү болору кошумчаланган.
Эске салсак, 17-май күнү кечинде Бишкекте чет элдиктер жашаган мейманкананын жанына 200дөй адам топтолгон. 13-майда бул жерде чет элдиктердин катышуусунда мушташ болгондугу маалымдалган. Топтолгон адамдарды милиция кызматкерлери курчап, өзүн агрессивдүү алып жүргөн 50дөй кишини кармап, кийин кайра коё берген. Түн оогондо чогулгандардын саны көбөйүп, миңге чейин жеткени айтылган.
Алар менен Бишкек ШИИББдин жетекчиси сүйлөшүү жүргүзүп, топтолгондор таңга жуук тарашкан.
Бул арада мушташка катышкан делип чет элдик жарандар кармалып, убактылуу кармоочу жайга киргизилген. Алар кыргыз элинен кечирим сурап, жоопкерчилик тартууга даяр экенин билдиришкен.