Уран жана торий кендерин иштетүүгө тыюу салууну жокко чыгарган мыйзам долбоору Жогорку Кеңешке түштү. Документ парламенттин сайтына жарыяланган. Мыйзам долбоору менен 2019-жылдын 14-декабрындагы "Кыргыз Республикасында уран, торий кендерин издөө, чалгындоо жана иштетүү максатында жер казынасын геологиялык изилдөөгө байланыштуу ишке тыюу салуу жөнүндө" мыйзамды күчүн жоготту деп табуу пландаштырылууда. Эске салсак, Экономика жана коммерция министрлиги бул мыйзам долбоорун февраль айында министрлер кабинетине сунуштаган. Уран казууга 2019-жылдан баштап тыюу салынган. Министрлик тыюу салуу боюнча мыйзам калктын саламаттыгын сактоого, ошондой эле радиациялык жана экологиялык коопсуздукту камсыздоого багытталганы менен документ дүйнөлүк кризис маалында өлкө экономикасы үчүн терс таасирин тийгизип жатканын белгилеген. Уран менен торий казууда бийлик экологиялык стандарттарды карманып, заманбап технологияларды киргизип мониторинг жүргүзүүгө милдеттүү болору белгиленген. Буга чейин президент Садыр Жапаров Кызыл-Омпол кенин Кыргызстан өзү иштетерин билдирген. Муну менен миңден ашык жумушчу орун түзүлөт.
Нарын облусунда башталгыч класстардан баштап IT программалары боюнча сабактарды киргизүү тажрыйбаланат. Бул тууралуу аймактык кабарчы билдирди. Маалыматка ылайык, демилгени облуста пилоттук негизде ишке ашыруу боюнча Билим берүү министрлигине сунуш берилет. "Президенттин Нарын облусундагы ыйгарым укуктуу өкүлчүлүгүндө IT программасын мектептерге киргизүү боюнча жыйын өткөрүлүп, билим берүү тармагынын, IT компанияларынын өкүлдөрү, мектеп директорлору менен бирдикте бул маселе кеңири талкууланды", — деп айтылат маалыматта. Ошондой эле 2025-жылга чейин Кыргызстанга 50 миңге жакын IT-адис керек экени белгиленген. Демилгенин негизги максаты — аймактарда туруп дүйнө жүзү менен иштешүүгө шарт түзүү.
Бишкекте Пакистандын жарандары тигүүчү цехтерде мыйзамсыз иштеп келген. Бул тууралуу УКМК билдирди. Атайын кызматтын маалыматына караганда, 28 чет элдик жарандын визасынын жарактуу мөөнөтү бүтүп калган. "Документи жок чет элдиктер бренд кийимдерди тигишкен. Тартип бузгандар Кыргызстандын Ички иштер министрлигинин экстремизмге жана мыйзамсыз миграцияга каршы күрөшүү кызматына жеткирилген. Алар административдик жоопкерчиликке тартылышат", — деди УКМК.
Россия менен Кытайдын ортосундагы өз ара соода жана инвестиция үчүнчү өлкөлөрдүн терс таасиринен ишенимдүү корголот. Бул тууралуу Владимир Путин Пекинде Кытайдын төрагасы Си Цзиньпин менен болгон сүйлөшүүлөрдүн жыйынтыгында билдиргенин РИА Новости жазды. Путин Кытайга мамлекеттик сапар менен кечээ түнү барган. Бул орус лидеринин кызматка киришкенден берки биринчи чет өлкөгө болгон сапары. "Орус-кытай коммерциялык операцияларында рубль менен юандын үлүшү 90 пайыздан ашты. Бул өз ара соода жана инвестиция үчүнчү өлкөлөрдүн терс таасиринен жана дүйнөлүк валюта рыногундагы терс тенденциялардан ишенимдүү корголду деп айта алабыз дегенди билдирет", — деди россиялык лидер. Анын айтымында, соода-инвестициялык байланыштарды тереңдетүүдө Россия менен Кытайдын ортосундагы төлөмдөрдү улуттук валютага которуу боюнча өз убагында макулдашылган кадамдар олуттуу жардам берди. Владимир Путин Си Цзиньпин менен эки өлкө ортосундагы кредиттик жана банктык мекемелер аркылуу байланыштарды мындан ары да бекемдөөгө, эки өлкөнүн экономикалык операторлорун тейлөө үчүн улуттук төлөм системаларын жигердүү колдонууга макулдашканын кошумчалады.