"Манас" эпосунда "кылгырты жүрчү көзүндө, кыңырты жүрчү өзүндө" деген саптар бар. Бул тууралуу Рысбай Исаков Sputnik Кыргызстан радиосуна маек куруп жатып билдирди.
Анын айтымында, "кылгырт" сөзүнүн чечмелениши эпостун түшүндүрмө сөздүгүндө "ичинде арам ою бар киши" деп туура эле берилген.
"Азыр "Манастагы" көп сөздөрдү кыргыз өзү билбей калды. Андыктан биз алгач ал сөздөрдү түшүнүп алып, анан баянды угууну сунуштайбыз. Мисал келтире турган болсок, Саякбай Каралаевдин вариантында "кылгырты жүрчү көзүндө, кыңырты жүрчү өзүндө" деп айтылат. Мына ушул "кылгырт" сөзү "кыл курт" дегенден келип чыккан. Сырттан келген эмес, ички душман жөнүндө айтылып, ичтен өйүгөн кылдай болгон куртка салыштырылган. Муну сөздүктөрдө "арам ою бар адам" деп бергенбиз. Мааниси туура эле. Бирок кайдан жаралган, уңгусу эмнени, мүчөсү эмнени түшүндүрөт деген суроого жооп берилбей калган. Мына ушул нерсеге көңүл буруп, сөздү түшүндүрөрдө этимологиясын кошо жазыш керек", — деди Исаков.
Ал түшүнүксүз сөздөр так, таасын чечмеленгенде эпос көркүнө чыгып, окурман жакшы кабыл аларын кошумчалады.