БИШКЕК, 10-май — Sputnik. Кыргызстандан эч ким бир грамм да алтын уурдай албайт. Бул тууралуу президент Садыр Жапаров "Кабар" агенттигиндеги маегинде билдирди.
Өлкө башчыга журналист "Асхат Осмонов аттуу жаран социалдык тармакта кыргыз алтынын чет өлкөгө жашыруун чыгарып кетишүүдө деген видео таратты. Ал сиздин байкеңиз Сабыр Жапаровду бул ишке тиешеси бар деп айыптоодо. Буга эмне дейсиз?" деген суроо узаткан.
Жапаров өлкөдөн алтын уурдоо мүмкүн эмес экенин белгиледи.
"Ал видеону көрүп күлкүм келди. Алтын уурдап башка өлкөлөргө чыгарып жаткан кишилер ошондой видео жасап, анан социалдык тармакка өздөрү таратат беле? Бүгүнкү күндө биздин өлкөдөн тоннасын бул жакка коёлу, бир грамм алтынды эч ким уурдай албайт! Өкмөткө тиешелүү бардык алтын кендерге, Кара-Балтадагы аффинаждык заводго видеокамераларды коюп, баарын онлайн-режимге киргизип койгонбуз. Күнү-түнү видеого тартылып, компьютерге жазылып турат. Аны миңдеген адистер түз эфирде карап отурушат. Ал видеолор сакталат. Бирөө-жарым бир грамм алтын уурдайт деген эч кимдин түшүнө да кирбейт", — деди президент.
Ал ошондой эле кокус кимдир бирөө жолун таап мамлекеттик мекемелерден алтын уурдап кармалса жүз эсе кылып кайтартарын белгиледи.
"Ал эми менин бир туугандарым, үй-бүлөм чет өлкөлөргө бир нерсе чыгармак турсун, тескерисинче, чет өлкөлөрдөн бул жакка ташып жатышат. Мөөнөтүм бүтүп кызматтан кетип жатканда өзүм эле эмес, бир туугандарым, бала-чакамдын кимиси өлкөбүзгө канча каражатты кайдан инвестиция кылып алып келгени, кайсы мекемелерди курушканы, кайсы тармакка канча каражат салганы, кыргыз элине, мамлекетибизге кандай пайда алып келишкени жөнүндө ар бирине отчёт бердирем. Ошондо көп чындыкты билесиздер. Азырынча айтпай турайын", — деди Жапаров.
Өлкө башчы Кыргызстан алтындан кайсы жылдары кандай пайда көргөнүн санаган:
"Кыргыз алтындан" 2020-жылга чейин таза киреше болгону 340 миллион сомду түзгөн;
2021-жылы дароо 2 миллиард 700 миллион сомго көтөрүлгөн;
2022-жылы 5 миллиард 600 миллион сом;
2023-жылы 12 миллиард 600 миллион сомго жетти.
"Ал эми Кумтөрдүн алтыны боюнча кеп кылсак, таптакыр башка сөз. Эгемендик алган жылдарыбыздан бери 2020-жылга чейин улуттук запасыбыз болгону 16 тоннага жеткен. Бүгүнкү күндө биздин улуттук запасыбыз 52 тоннаны түзөт", — деди ал.
Жапаров жылдын аягына чейин бул сан дагы жогорулай турганын, ошондуктан ар кандай жасалма видеолорго ишенүүнүн кереги жок экенин кошумчалады.