Конституциялык соттун курамы тогуз кишиден азайбашы керек. Учурда Конституциялык соттун төрагасынан, төраганын орун басарынан жана жети судьядан турарын Чынара Айдарбекова Sputnik Кыргызстан радиосунун эфиринде маек куруп жатып билдирди.
Анын айтымында, буга чейин Конституциялык палатанын курамы 11 судьядан түзүлгөн.
"Конституциялык сот конституциялык көзөмөл жүргүзүүчү сот бийлигинин жогорку органы жана ал бардык башка коомдук бийликтен көз каранды эмес. Судьялар Жогорку Кеңештин депутаттарынын жалпы санынын жарымынан кем эмес добушу менен шайланат. Учурда Конституциялык соттун төрагасынан, төраганын орун басарынан жана жети судьядан турат. Эгерде тогуз судьянын кворуму алты киши болуп, анын көпчүлүгү төрт гана адам болуп алат. Демек, маселени төрт эле адам чечип коюшу мүмкүн. Андыктан Конституциялык соттун курамы тогуз кишиден азайбашы керек. Судьялардын саны көп болсо талкуусу да узак болот, ар тараптуу пикир болуп, чечимди туура чыгарууга шарт түзүлөт. Мисалы, Казакстанда Конституциялык кеңеш Конституциялык сот болуп өзгөрүп, курамы 7 кишиден 11ге көбөйдү. Бизде 2020-жылы Конституциялык палатанын судьялары абдан көп деген сын айтылган эле", — деди Айдарбекова.
Ошондой эле адис судьялыкка өз пикири бар, тажрыйбалуу юристтер келиши керектигин кошумчалады.