БИШКЕК, 10-май — Sputnik. Кыргызстандын акыйкатчысы Жамиля Жаманбаева мамлекеттик органдарды аскер кызматкерлеринин укуктарын сактоого чакырды.
Акыйкатчынын маалымат кызматы билдиргендей, аскерге чакырылган катардагы жоокерлердин жана офицерлердин укуктарын коргоо маселеси курч бойдон калууда. Алардын укуктарын камсыздоо жана ден соолугун сактоо үчүн тез арада чара көрүү талап кылынат.
Укук коргоочулар Коргоо министрлигинин аскердик госпиталына мониторинг жүргүзүшкөн. 2024-жылдын 1-январынан 26-мартына чейин жалпы 607 киши кайрылган. Алардын 139у — катардагы жоокерлер (21%).
"15 аскер кызматкеринин кабыргасы сынып, буту-колунан ар кандай жаракат алган. Эки жоокер ийне жутуп ооруканада жатат. Ал эми Аскердик прокуратура кээ бир жоокерлер өздөрүнүн этиятсыздыгынан улам жарадар болгонун айтууда", — деди Акыйкатчы институту.
Мониторинг учурунда аскерге чакырылган жоокерлердин госпиталга келип жатышынын бирден-бир себеби медициналык комиссия учурунда өнөкөт же башка оорулары аныкталбай, машыгууда илдеттери курчуп кетиши экени белгилүү болгон.
"Коргоо министрлигинин маалыматы боюнча, медициналык комиссияда УЗИ аппараты жок болгондуктан алардын ички органдарына текшерүү жүргүзүлбөйт. Мындан сырткары, аскер кызматы учурунда госпиталга ар кандай жаракаттар менен жиберилет. Уставга ылайык, мындай учурда тиешелүү кызматтарга, анын ичинде Аскер прокуратурасына бул тууралуу маалымат жиберилиши керек", — деп айтылат билдирүүдө.
Аскер прокуратурасынын маалыматына ылайык, 2024-жылдын биринчи кварталында аскер госпиталына жалпысынан 15 аскер кызматкери кайрылган. Тогуз факт боюнча кылмыш ишин козгоодон баш тартылса, алты факт боюнча тергөөгө чейинки текшерүүнүн жыйынтыгы менен маалым кат түзүү жана аскер бөлүктөрүнүн командирлерине маалымдоо жиберүү чечими кабыл алынган.