БИШКЕК, 6-май — Sputnik. Россия президентинин маалымат катчысы Дмитрий Песков эмне үчүн ракеталарды колдонуу менен машыгууларды өткөрүү пландалып жатканын түшүндүргөнүн РИА Новости жазды.
Анын айтымында, ракеталык машыгуулар Батыш саясатчыларынын Украинага аскер жөнөтүү ниети тууралуу билдирүүлөрүнө байланыштуу.
“Чынында Коргоо министрлигинин билдирүүсүндө толук айтылган. Эгер кайсы билдирүүлөр жөнүндө кеп болуп жатканы суроо жаратса, анда Макрон мырзанын жана британ өкүлдөрүнүн сөздөрү экени анык көрүнүүдө. Алардын катарына АКШ Конгрессинин мүчөсү кошулду. Алар Украинага куралдуу күчтөрдү жөнөтүү ниетин билдирип, даярдыгын айтышууда”, — деген Песков.
Ал аталган саясатчылар НАТОнун жоокерлерин орус аскерлерине каршы койгусу келип жатканын белгиледи.
“Бул чыңалуунун болуп көрбөгөндөй жаңы раунду, албетте, өзгөчө көңүл бурууну жана ошондой чараларды талап кылат”, — деп баса белгиледи маалымат катчы.
Бүгүн Куралдуу күчтөрдүн Башкы штабы президент Владимир Путиндин тапшырмасы боюнча машыгууларды өткөрүүгө даярдыктар башталганын өлкөнүн Коргоо министрлиги билдирген. Ал күжүрмөн тапшырмаларды аткарууда стратегиялык эмес өзөктүк күчтөрдүн даярдыгын жогорулатуу максатында авиацияны, деңиз күчтөрүн тартуу менен Түштүк аскер округунун ракеталык түзүмдөрү менен болору белгиленген.
Өткөн аптада европалык саясатчылар Украинадагы жаңжал боюнча кескин билдирүүлөрдү жасашкан. Маселен, Франциянын президенти Эммануэль Макрон эгер Россия фронт линиясын бузуп, ал эми Киевден тийиштүү өтүнүч болсо Украинага аскерлерди жөнөтүү ыктымалдуулугун айткан. АКШ Конгрессинин Өкүлдөр палатасындагы Демократиялык азчылыктын лидери Хаким Жеффрис да Украинадагы жаңжалга америкалык жоокерлердин катышуусун четке каккан жок. Анын айтымында, Украинанын Куралдуу күчтөрү жеңилсе мындай сценарий болушу мүмкүн. Саясатчы Вашингтон "Киевдин кыйрашына жол бере албайт" деп баса белгиледи.
Мындан тышкары, Британиянын тышкы иштер министри Дэвид Кэмерон Украина Лондон тарабынан жеткирилген курал менен Россиянын аймагына сокку урууга укуктуу деген пикирин айткан.
Кремль Батыш саясатчыларынын Украинадагы жаңжалга түз кийлигишүү ыктымалдыгы тууралуу билдирүүлөрүн өтө кооптуу тенденция деп атады.