БИШКЕК, 4-май — Sputnik. Бүгүн, 4-майда, мамлекет башчы Садыр Жапаров Сузактагы окуяда жабыркаган балдардан кабар алганын маалымат катчысы Аскат Алагөзов соцтармактагы баракчасы аркылуу билдирди.
Анын айтымында, кырсыктан жабыркап, абалы оор деген 10 бала атайын борт менен Бишкекке алып келинип, Тез жардам балдар клиникалык ооруканасына жаткырылган.
"Президент дарыгерлер, балдардын ата-энелери, жакындары менен сүйлөшүп, аларды дарылоого мыкты медиктерди тартып, дары-дармек менен толук камсыздоону тапшырды", — деп жазган Алагөзов.
Мамлекет башчы окуяга кайдыгер мамиле кылгандарга комиссия ишинин жыйынтыгы менен чара көрүлөрүн белгилеген.
Эске сала кетсек, 2-май күнү саат 14:00дөр чамасында Катмы жайлоосунда манас айтып жаткан балдарды Porter унаасы жылып кетип, сүзгөн. Кырсыктан 35тей бала жабыркаган. Кечээ, 3-майда, алардын айрымдары Бишкекке алып келинген.
48 жаштагы айдоочу көрсөтмөсүндө балдарга бекер балмуздак таратканы барганын, Жерге-Тал айылдык мектебинин директорунан таттууну кайсы жакка жеткирүү керек экенин сурап телефон чалып жатканда машинасы ылдыйга түшүп кеткенин, артынан токтотконго жетишпей калганын айткан.
Бүгүн 9 жаштагы кыздын башына операция жасалган. Бардыгынын абалы туруктуу экени айтылды.