БИШКЕК, 30-апр. — Sputnik. Кыргыз эл акыны, сатирик, фельетончу Жолочу Рысбаевдин дүйнөдөн кайткандыгына байланыштуу президент Садыр Жапаровдун жана мамлекеттик ишмерлердин атынан некролог жарыяланды.
Рысбаев 75 жашында 30-апрелде көз жумган.
“Кыргыз эли, улуттук адабияты оор жоготууга учурады”, — деп жазылган некрологдо.
Жолочу Рысбаев Ысык-Көл облусундагы Түп районунун Жылуу-Булак айылында 1949-жылы 25-июнда туулган.
Орто мектепти аяктагандан кийин Кыргыз мамлекеттик университетинин филология факультетине өтүп, аны 1974-жылы ийгиликтүү аяктаган.
Алгачкы чыгармачылык жана эмгек жолун 1975-жылдан тарта Кыргыз ССРинин Телерадиоберүү боюнча мамлекеттик комитетинде редактор болуп баштап, андан кийин адабий-драмалык редакциясынын башкы редактору кызматын аркалаган. Ал кыргыз радиоугармандары менен телекөрүүчүлөрүнө “Кутмандуу болсун күнүңөр”, “Шибеге” радиоуктурууларынын редактору, эл сүймөнчүгүнө ээ болгон “Мыскыл жана тамаша” телеберүүсүнүн алгачкы уюштуруучусу жана автору катары таанымал болгон.
2005-жылдан 2010-жылга чейин Чүй облусунун “Сары-Өзөн” телерадиокомпаниясында улук редактор болуп иштеген. 2010-жылдан тартып 2012-жылга чейин “Кыргыз радиосунун” кабарчысы болгон.
Кыргыз тилинде “Чырмоок”, “Коңгуроо” , “Ой шумдук”, “Оозуңа таш” , “Ап-чихи чүчүңүз” , “Мен Мидин эмесмин, Мидин мен эмес”, “Ачуу-таттуу аралаш”, “Какабасаң муштабайт элем”, “Сары тикендүү сатиралар” жана “Аарынын уусу ачуу, балы таттуу” жана башка сатиралык чыгармалары, орус тилинде “Тысяча и одна улыбка”, “Солнечный край” китептери жарык көргөн. Эл арасында кеңири белгилүү “Жар-жар” жана “Сулууларга суктанууга акым бар” деген обондуу ырлардын автору.
Жолочу Рысбаев өкмөткө караштуу Интеллектуалдык менчик жана инновациялар мамлекеттик кызматынын Ардак грамотасы менен сыйланган, 2019-жылы Кыргыз Республикасынын маданиятына эмгек сиңирген ишмер, 2021-жылы Кыргыз Республикасынын эл акыны ардактуу наамдары ыйгарылган.
1988-жылдан тартып СССР жазуучулар союзунун мүчөсү.