БИШКЕК, 24-апр. — Sputnik. Системалуу коррупцияга шектелип Салык кызматынын Биринчи май району боюнча башкармалыгынын беш кызматкери кармалганын УКМК билдирди.
Маалыматта алар Кылмыш-жаза кодексинин 342-беренесинин ("Адамдардын тобу тарабынан пара алуу") негизинде колго түшүрүлгөнү айтылат.
УКМК аталган кызматкерлер байкоо камералары коюлбаган жерлерде салыкка байланышкан айрым маселелерди чечип же тездетип бергени үчүн байма-бай акча алып турушканын аныктаган.
"Тергөө иштеринин жыйынтыгы менен ишкердик субъектилеринен акча алган көптөгөн фактылары документтештирилген. Шектүүлөр 22-апрелде кармалып, Бишкек ШИИБдин убактылуу кармоочу жайына киргизилди", — деп айтылат кабарда.
Учурда аталган кылмышка тиешеси бар башка кызматкерлер аныкталып жатканы кошумчаланды.