БИШКЕК, 22-апр. — Sputnik. Эмгек өргүүдө гана эмес, жума сайынкы бир-эки күндүк дем алыш күндөрдө да кадимкидей эс алып, күч жыйнап алса болорун Sputnik радиосуна курган маегинде психолог Наталия Минаева айтып берген.
Адистин айтымында, адамдын эс алуусун социалдык тармактарга улам кирип, жаңылыктарды окуп, андагы сүрөт-видеолорго алаксып өткөрүүсү бузат. Мындай күндү эс алуу деп атаганга болбойт, тескерисинче, бул кишини чарчатат.
"Бул учурда адамдын организминде дофамин бөлүнүп чыгып, физиологиялык процесс жүрөт. Адам кечке жатып, эс алдым дегени менен соңунда өзүн чарчагандай сезет. Ошондуктан дем алыш күндөрүндө алектенчү нерселерди туура тандоо зарыл", – деген Минаева.
Психологдун айтымында, кыймылды, сыртка чыгууну шарттаган эс алууну уюштурган туура.
"Ар ким өзү жактырганга жараша тандап алса болот. Мисалы, сейил бактарга балдар менен барып сейилдөө, жаратылыш койнунда болуу, театр, көргөзмөлөргө баруу эс алуу үчүн жакшы. Айтор, күндү керебетте жатып эле өткөрбөстөн, кыймылдаган шарт. Эгерде адам катуу чарчап такыр баскысы келбей жатса бир күнү жатып эс алып, кийинки дем алышты активдүү кыймылда өткөргөнү оң. Пассивдүү эс алууну тандоо туура эмес болуп калат", – деген психолог мээни эс алдыруу үчүн адам күн сайын алектенген нерсесинен алыстап, башка иштерге алаксууну сунуштаган.
Минаева мээ бир иш-аракеттен башкасына өткөндө адамда эс алуу болорун кошумчалап, театрдан чыккандан кийин сейилдеп, андан кийин кафеде үй-бүлө менен тамактануу өңдүү түрдүү аракеттерди жасаган оң экендигин түшүндүргөн. Кыска убакыт болсо деле дайыма жасап жүрбөгөн нерселерге алаксыганы туура. Психолог адам чарчаганын жазыш үчүн ага бөлгөн күндүн саны эмес, ошол күндөрдү кандай өткөргөндүгү маанилүү экенин айткан.