БИШКЕК, 19-апр. — Sputnik. Израиль Ирандагы бир катар объектилерге ракета менен чабуул жасаганын РИА Новости ABC News телеканалына таянып билдирди.
Иран ЖМКлары Исфахан шаарынын аэропортунун аймагында бир нече жарылуулар болгондугун билдирген. Fars агенттигинин маалыматына караганда, аба майдандын жанынан жана Ирандын Аскер-аба күчтөрүнүн базасында жарылуунун үнү угулуп, Абадан коргонуу системалары иштеген.
Тегеран, Исфахан жана Шираз шаарларынан авиакаттамдар белгисиз мөөнөткө токтотулду. Ал арада Bloomberg агенттиги кырдаалдан кабардар болгон маалымат булактарга таянып, Израиль жума күнү АКШ өкмөтүнө Иранга 24-48 саат аралыгында жооп катары чабуул кыларын билдиргенин жазды.
Ирандын Ислам революциясынын сакчылар корпусу (куралдуу күчтөрдүн элиталык армиясы) 2024-жылдын 14-апрелине караган түнү Израилдин аймагына контрчабуул жасаган. Бул Тегерандын Израилдин учактары Сириядагы Иран консулдугун бомбалоосуна берген жообу болгон.
14-апрелдеги кол салуу ар кыл маалымат булактарына ылайык, ондон тарта жүзгө чейинки ракеталар жана пилотсуз учуучу аппараттар, анын ичинде Shahed камикадзе дрондору менен коштолгон. Кийинчерээк алардын арасында "Фаттах", "Фаттах-2" кубаттуу ракеталары болгону жана ал максатына жеткени айтылды.
Израиль армиясынын маалыматы боюнча, Иран аларга каршы 300дөн ашуун пилотсуз учак менен ок-дары колдонгон. Анын ичинде 170ке чукул дрон, 30дан ашык канаттуу жана баллистикалык 120 ракета бар. Анткен менен Иран алардын аймагына "бир нече" ракета жеткенин, "чыгым көп деле болбогонун" айтууда.
Ирандын Куралдуу күчтөрүнүн Башкы штабынын жетекчиси Мохаммад Багери Тегеран "Чындык убада" операциясын аяктагандыгын жана аны улантпай тургандыгын билдирген. Эгерде Израиль кандайдыр бир дагы башка чараларды көрө турган болсо, иран операциясы мурдагыдан катуу болоруна убада берген эле.
Израилдик министр Бени Ганц өлкө Иран кооптуулугуна каршы аймактык коалиция түзүү ниетинде экендигин жана чабуулга тиешелүү түрдө, тиешелүү саатта жооп кыларын билдирген. Агенттик Тегерандын мындан аркы кадамдарын жакында аныктай турганы күтүлүп жатканын кошумчалаган.