БИШКЕК, 11-апр. — Sputnik. Депутаттар бала бакчалардагы тамак-ашты ата-энелер гана төлөгөн норманы алып салды. Демилгени депутат Элвира Сурабалдиева баштаган бир нече депутат иштеп чыккан.
"Билим берүү жөнүндө" мыйзамга өзгөртүү киргизүү долбоору Жогорку Кеңештин 11-апрелдеги жыйынында үчүнчү окууда кабыл алынды.
Баяндама жасаган Социалдык саясат боюнча комитеттин төрайымынын орун басары Аида Исатбек кызы мыйзам долбоорунун максаты мектепке чейинки билим берүү боюнча жарандардын конституциялык укуктарын камсыздоо болуп эсептелерин белгиледи. Ошондой эле бала бакчаларда тамак-ашты ата-энелер гана төлөгөн ченемди алып салуу болуп саналарын кошумчалады.
Мында "Билим берүү жөнүндө" мыйзамынын 28-беренесинин 6-бөлүгү күчүн жоготту деп таануу сунушталууда.
Белгилей кетсек, 2023-жылдын 11-августунда кабыл алынган "Билим берүү жөнүндө" мыйзамга бала бакчаларда тамактанууну уюштуруу ата-энелердин каражатынын эсебинен жүзөгө ашырылган норма киргизилген. Эми ата-энелер баласынын тамак-ашына көмөктөшүүгө гана укуктуу. Башкача айтканда, жарым акчаны ата-эне төлөсө, калганы мамлекеттин эсебинен берилери жазылган.