БИШКЕК, 11-апр. — Sputnik. Апрелден тарта республикада аскердик окуу жайларга тапшырууну каалаган абитуриенттердин документтерин кабыл алуу башталды. Ал айдын аягына чейин уланарын Коргоо министрлиги маалымдады.
Келечекте аскер кызматкери болууну каалагандар кайда кайрылып, кандай сынактардан өтүшү керектигин министрликтин Аскердик билим берүү жана илим башкармалыгынын башчысы Канагат Уразбеков түшүндүрүп берген.
Анын айтымында, өлкөдө Дайыр Асанов атындагы улуттук аскер лицейи жана Калыйнур Үсөнбеков атындагы Аскер институту бул жаатта билим берет.
Улуттук аскер лицейине балдар 9-классты аяктап тапшырышат. Анда эки жыл окуган соң орто кесиптик аскердик билимге ээ болушат. Ал эми Калыйнур Үсөнбеков атындагы институт — аскердик жогорку окуу жай. Мында окуу мөөнөтү төрт жыл.
"Абитуриент адегенде mil.gov.kg сайтына кирип, керектүү документтердин тизмеси менен таанышат. Андан кийин өзү жашаган аймактагы Аскер комиссариатына барып арыз жазып, кеп-кеңеш алат. Зарыл болгон бардык документтер тапшырылган соң сынактар жүргүзүлөт. Мисалы, Аскер институтуна тапшыруу үчүн ЖРТ тапшырышы керек. Андан соң медициналык кароодон өткөрүлөт. Андан кийин экинчи этап башталат, мында дене тарбиялык сынактар жүргүзүлөт. Кийинки турда абитуриенттер бир нече предмет боюнча тест тапшырышат. Ошол эле учурда абитуриенттин психикалык туруктуулугу да текшерилет", — деген Уразбеков.
Мындан тышкары, ал кыргызстандык жаштар аскер кызматкери болуу үчүн Россия, Казакстан, Өзбекстан, Кытай, Азербайжан, Индиядагы жогорку окуу жайларга да тапшыра алышарын кошумчалаган.