БИШКЕК, 3-апр. — Sputnik. Бишкекте "Менин ден соолугум – менин укугум" аталышындагы марафон өтөт. Бул тууралуу Ден соолукту чыңдоо борбору маалымдады.
Билдирмеге ылайык, жыл сайын 7-апрелде дүйнөдө Ден соолук күнү белгиленет. Массалык чуркоо бул күндү утурлай өткөрүлөт. Борбордон иш-чара президент Садыр Жапаровдун демилгеси менен уюштурулуп жатканын белгилешти.
"Ага саламаттык сактоо министри Алымкадыр Бейшеналиев, Дүйнөлүк саламаттык сактоо уюмунун Кыргызстандагы өкүлү Ливиу Ведраско, Жогорку Кеңештин депутаттары, спортчулар Айсулуу Тыныбекова, Акжол Махмудов, Жоламан Шаршенбеков жана медицина кызматкерлери катышат. Иш-чараны Саламаттык сактоо министрлиги Дүйнөлүк саламаттык сактоо уюму менен бирге уюштурууда. Борбор калаадагы марафон бир жуманын ичинде өлкөнүн бардык аймактарын камтыган ден соолук кербенинин башталышы болот", — дешти борбордон.
Ошондой эле ал эстрада жылдыздарынын концерттик программасы менен коштолорун кошумчалашты.
Иш-чара 6-апрелде саат 10:00дө Жайыл баатыр көчөсү, №66 дарегиндеги "Газпром" спорт комплексинен башталат.