БИШКЕК, 30-мар. — Sputnik. РФ ТИМинин расмий өкүлү Мария Захарова Владимир Зеленскийдин Киев менен Москванын сүйлөшүү мүмкүндүгү тууралуу айтканына пикирин билдирди. Бул тууралуу РИА Новости жазды.
Буга чейин Зеленский Москва менен Киевдин ымалага келүү боюнча сүйлөшүүлөрү Украинанын чек арасын 1991-жылдагы абалга кайтарууну козгобой туруп баштоо мүмкүнчүлүгүн биринчи жолу оозанган болчу.
Захарова Украина президентинин тынчы алдыда шайлоо болот же болбойт деген маселе тургандыктан кетип жатат деп билдирген.
Украинада президенттик шайлоо ушул жылдын 31-мартында өтүшү керек болчу. Бирок согуш жана жалпы мобилизациядан улам ал токтотулган. Зеленский өзү азыр шайлоо өткөрө турган мезгил эместигин, бул маселеге чекит коюлушу керектигин айткан. Украинанын мурдагы премьер-министри Николай Азаров Зеленскийдин ыйгарым укуктары 21-майда бүтөрүн билдирген.
"Тынчы кетүүдө. Алдында шайлоо турат. Же шайлоо болбой калабы?" —деген Захарова РИА Новостиге.
Москва буга чейин сүйлөшүүлөргө даяр экенин бир нече жолу билдирип келди, бирок Киев мыйзам деңгээлинде буга тыюу салган. Батыш өлкөлөрү Москваны сүйлөшүү жолуна чакырып келет. Буга Россия дайыма даяр экенин айтканы менен Батыш Киевдин сүйлөшүүдөн баш тартканын көңүл сыртында калтырууда.
Буга чейин Кремль Украинадагы абалды азыр тынчтык жолуна салууга негиз жоктугун, Россия үчүн башкы приоритет атайын операциянын максатына жетүү экенин, бул согуш жолу менен гана мүмкүн болуп жатканын айткан. Москва Украинадагы жагдай Киев де-факто абалын жана жаңы реалдуулукту кабыл алганда гана тынчтык жолуна түшөрүн, ал эми Москванын бардык талаптары Киевге белгилүү экенин билдирген.