БИШКЕК, 26-мар. — Sputnik. Министрлер кабинетинин төрагасы Акылбек Жапаров кыргыз-казак чек арасындагы "Ак-Жол" көзөмөл-өткөрүү пунктун күтүүсүз текшерип барып, айланасындагы алынбай турган күркөлөр үчүн эки кызматкерди иштен алды.
Ал көзөмөл-өткөрүү пунктуна жакын жайгашкан жерлерди көрүп жатып иштебей турган күркөлөрдөн улам кызматкерлерди тилдеген.
"Бул комоктордун баарына ким уруксат берип жатат? Бирөө уруксат берген үчүн турат да. Экөөнү тең (Жол чарба департаментинин кызматкерлери) иштен алгыла да, башкаларды алып келип, тазалагыла бул жерди! Сөзсүз эле мага, президентке жеткенде баштайсыңарбы? Кайсы бетиңер менен кишилерди тосуп атасыңар ушул жерден?" — деген Жапаров.
Өкмөт башчы көзөмөл-өткөрүү пунктунун айланасын көрктөндүрүп, тазалыгын сактап, жол кыймылынын коопсуздугун камсыз кылуу жагынан тартипти калыбына келтирүүнү тапшырган.