БИШКЕК, 26-мар. — Sputnik. Кемин районунда клинкер өндүрүүчү "Терек-Таш" заводу иштей турганын министрлер кабинетинин маалымат кызматы билдирди.
Анын курулушунун жүрүшү менен өкмөт башчы Акылбек Жапаров таанышты.
"Үстүбүздөгү жылдын август айында заводду ишке киргизүү күтүлүүдө. Ишкананын өндүрүштүк кубаттуулугу суткасына 3 800 тоннаны (жылына 1 миллион тоннадан ашык) түзөт. Инвестициялардын жалпы суммасы 160 миллион доллар", — деп айтылат маалыматта.
Белгилей кетсек, клинкер өндүрүүчү ишкана кытайлык Sinoma компаниясы тарабынан курулууда.
Клинкер – бул курулуш материалы. Ал акиташ, чопо жана шлактын агломерацияланган аралашмасын жогорку температурада күйгүзүү жана андан кийин майдалоодон пайда болот.