БИШКЕК, 22-мар. — Sputnik. Борбор калаада порнографиялык сайттарды иштетип, жаш баланы порнобизнеске тартууга шектелген жаран кармалды. Бул туурасында Бишкек ШИИБдин маалымат кызматы билдирди.
Мындай кылмыштын бетин ачуу операциясы Интерполдун Улуттук борбордук бюросу менен биргеликте Нидерланд жана Норвегия полициясынын көмөгү менен жүргүзүлгөн.
"Балдардын сексуалдык зомбулуктарын камтыган материалдарды сактоо жана жайылтуу фактылары ачык түрдө веб-сайтта жана даркнетте аныкталган. Ошондой эле балдар катышкан порнографиялык мазмундагы сайттар түзүлүп, таратылып жаткан. Сайттарга кирүү үчүн криптовалюта менен төлөп, накталай акча алуу Кыргызстандын жарандарынын катышуусу менен ишке ашып турган", — деп айтылат маалыматта.
Аталган факт боюнча Кылмыш-жаза кодексинин 162-беренесине ("Баланы порнобизнеске тартуу") ылайык кылмыш иши козголгон. Натыйжада 35 жаштагы Н.М.Т. аттуу жаран кармалды.
Милициянын маалыматы боюнча, шектүүнүн жашаган жеринен техникалык жабдуулар, персоналдык компьютерлер жана ага тиешелүү тетиктер табылган. Бир компьютеринен балдар катышкан порнографиялык материалдарды камтыган файлдар да аныкталган.