БИШКЕК, 21-мар. — Sputnik. Садыр Жапаров бүгүн, 21-мартта, "Аккула" ат майданынын жаңы курула турган имаратына капсула салды. Бул тууралуу президенттин маалымат кызматы билдирди.
Жаңы ат майданда көк бөрү оюндарын көрүү үчүн 10 миң орун, ал эми башкы ат майдан 20 миң орундуу болору айтылды. Ипподромго 200 гектардан ашык жер бөлүнүп берилген.
Мамлекет башчысы бул жай кыргызстандыктарды гана эмес, чет элдиктерди да таң калтырып, кызыгуусун арттырган заманбап маданий-спорттук жай болоруна ишенерин айтты.
"Ат майданыбыз спорттук иш-чаралардын борбору гана болбостон, атуулдарыбыздын демине дем, күчүнө күч кошо турган жайга айланат", — деди Жапаров.
Ат майданынын имараты көп функционалдуу болот. Анын ичинде соода борбору, мейманкана, дүкөн, кафе-ресторан иштээри эске алынган, комплекстин жыл бою иштөөсү үчүн бардык шарттар каралган. Ат оюндарынын көрүүчүлөрүнүн коопсуздугу да эске алынган.
Президент жаңы ипподром Бишкектин батыш тарабында жайгашкандыктан масштабдуу иш-чараларды өткөрүүдө шаар тургундарына ыңгайсыздыктар жаралбай турганын айтты.
Мурдагы ат майдандын аянты 57 гектар болуп, үч миңдей кишини гана сыйдыра алчу.