БИШКЕК, 20-мар. — Sputnik. Кыргызстан менен Казакстан союздук мамилени кеңейтүү боюнча келишим түзөт. Бул тууралуу Sputnik Казакстан агенттиги жазды.
Маалыматка караганда, буйруктун долбоору "Открытые НПА" сайтына жарыяланган. Документке ылайык, Астана менен Бишкек бири-бирине зыян келтире турган биримдик, блокторго катышпоо милдетин алышмакчы. Ошондой эле коопсуздукка коркунуч жараткан үчүнчү жактар менен кызматташуу же башка иш-аракеттерден да карманышат.
Башка мамлекеттерден куралдуу кол салуу коркунучу жарала турган болсо, Кыргызстан менен Казакстан кечиктирбестен бири-бири менен кеңешет.
"Бул келишим БУУ уставынын 102-беренесине ылайык Бириккен Улуттар Уюмунун катчылыгында катталат”, - деп айтылат кабарда.
Документке кол качан коюлары азырынча белгисиз.