БИШКЕК, 18-мар. — Sputnik. Кыргызстандагы медициналык менчик мекемелерде томографиялык текшерүүлөрдүн баасы төмөндөтүлдү. Бул тууралуу УКМКнын маалымат кызматы кабарлады.
Билдирмеге караганда, атайын кызмат клиника башчылары менен бааны жөнгө салуу боюнча жыйын өткөргөн. Анын жыйынтыгында "Юнит-Реактив Фарма", "Медипол", "Томэкс", "Шаншуй Силк Роуд Кейджи", "Альфа МЕД-ЛТД", "Берди", "Медипарк", "Гульмед", "Систем Озел Тыбби Йатырымлар ве Тиджарет", "Юрфа", "Авиценна", "Меди" жана "Веданта" борборлору томографияга тартуу кызматынын баасын 20 пайызга арзандатууга макул болгон. Ал эми "Кортекс" неврологиялык борбору томография баасын 30 пайызга чейин арзандатмакчы.
Эске салсак, буга чейин бир катар менчик лабораториялар изилдөөлөрдүн (анализдердин) баасын 30 пайызга чейин төмөндөткөн. Ал эми "Бонецкий" лабораториясы мамлекеттик медициналык мекемелерде дарыгердин жолдомосу менен барган бейтаптарга 50 пайызга чейин жеңилдетилген кызмат көрсөтүүдө.