БИШКЕК, 15-мар. — Sputnik. Президент Садыр Жапаров Бишкектеги Имам Сарахси атындагы борбордук мечитинен шам намазын окуп, чогулгандарга ооз ачырды. Бул тууралуу анын маалымат катчысы Аскат Алагөзов билдирди.
Мамлекет башчысы бардык мусулмандарды ыйык Орозо айы менен куттуктап жатып дин боюнча маалыматтарды атайын илими бар аалымдардан алууга чакырган.
"Ошондой эле өлкөдө жаш балдар арасында кызамык оорусу күч алганына тынчсыздануусун билдирип, статистика боюнча, ооруган балдардын басымдуу бөлүгү эмдөөдөн өтпөгөндөр экенине көңүл бурду. Буга байланыштуу балдардын саламаттыгы үчүн ооруларды алдын алууда эмдөөдөн өтүү маанилүү экенин белгиледи", — деп билдирди Алагөзов.
Жапаров орозо кармагандардын бата, тилектеринин кабыл болушун, өлкөгө өнүгүү, калкка бакубатчылык каалаган.