Баланын сөөктөрүнүн деформация болушуна эненин ден соолугун толук калыбына келтирбей удаа төрөшү да таасир этет. Бул тууралуу Жантай Шамбетов Sputnik Кыргызстан радиосуна маек куруп жатып билдирди.
Анын айтымында, учурда кичинекей балдардын салмагына жараша D витамини берилет. Бул анын сөөктөрүнүн калыптанышы үчүн өтө маанилүү.
"Бут оорулары, вальгус, сөөктүн деформацияланышы тубаса же кийин кайсы бир себептерден улам пайда болот. Бала энесинин курсагындагы кезинде хромосомалык ооруларга кабылганда ымыркайдын сөөктөрү деформацияланып же дагы башка илдеттер менен төрөлөт. Учурда өлкөнүн аймактарында жашаган балдардын көбүндө витамин жетишпейт. Мурда йоддун жетишпестигинен жабыркашса, азыр итий жана сөөк ооруларына чалдыгып жатканын байкоого болот. Көбүнчөсү убагында врачтарга кайрылып, дарыланбайт. Мындан улам бала мектепке бара баштаганда гана дарты билинип ата-энеси чуркай башташат", — деди Шамбетов.
Ал бала өзү таканчыктап туруп, басууга аракет кылмайынча эрте бастырып, заманбап чыгырыкка (ходунок) салууга болбостугун кошумчалады.