БИШКЕК, 14-мар. — Sputnik. Беларустун мамлекеттик чек арасындагы абал оор жана анын быйыл жакшырышы күтүлбөйт. Бул тууралуу Коопсуздук кеңешинин статс-катчысынын орун басары Александр Неверовский билдиргенин РИА Новости БелТА агенттигине шилтеме берип жазды.
"Мамлекеттик чек аранын айланасында абал өтө оор. Бул жылы абал жеңилдеп кетпейт. Анткени Беларусь узакка созулган ири аскердик-саясий кризистин жанында жайгашкан", — деди Неверовский.
Ал НАТОнун ишмердүүлүгүнүн масштабы жана даярдыгы тынымсыз өсүп жатканын билдирди.
"Акыркы эки жылдын ичинде гана НАТОнун Польшадагы жана Балтика боюндагы өлкөлөрдөгү аскердик машыгууларынын жылдык саны үч эседен ашык көбөйдү. Ал эми курамы беш эседен ашык өстү. Үстүбүздөгү жылдын февраль айынан майга чейин "Күчтүү коргоочу — 2024" машыгуусу өтүп жатат. Ага НАТОнун өнөктөштөрү менен 32 өлкөдөн келген 90 миңдей аскер кызматкери катышууда", — деди Неверовский.
Анын айтымында, Беларусь менен Россиянын аймагында теракт жасоо үчүн Украина, Польша жана Балтика мамлекеттеринин аймагында согушкерлер, диверсанттар жигердүү даярдык көрүп жатканы белгилүү.
"Ошол эле учурда бул мамлекеттердин достукка жатпаган саясаты биздин өлкөнүн жакшы коңшулук мамилелерге умтулуусуна карабастан жүргүзүлүүдө. Буга 2024-жылы коңшу мамлекеттердин жарандары үчүн визасыз режимди узартуу жөнүндөгү чечимибиз далил. Украин тарап эки жылдан ашык убакыттан бери чек ара аркылуу адамдарды жана унааларды өткөрүүнү токтоткон. Бирок украин жарандарына биздин аймакка кирүүгө тыюу салган жокпуз. Атайын операция башталгандан бери биздин өткөрмө бекеттерден 172 миңдей украиналык жаран өттү. Ушул жылдын башынан бери 18 миң киши кирди", — деди ал.
Ал чек ара тилкелериндеги провокациялар токтобой жатканын эске салды.
"Өткөн жылы эле чек арачылар коңшу мамлекеттердин (Евробиримдик – ред.) аймагынан 35 миңдей качкындын мыйзамсыз чыгарылышын токтотушкан. Мигранттарга карата колдонулган адамгерчиликсиз чаралар көбүнчө алардын өлүмүнө алып келет. Өткөн жылы Чек ара кызматы 27 качкындын өлүмүн документтештирген. Үстүбүздөгү жылдын башынан бери Польша, Литва жана Латвия чек арачыларынын катаал мамилесинен улам чек арада төрт качкын каза болду", — деди Неверовский.
Ал Беларусь мамлекеттик чек араны коргоо боюнча бардык чараларды көрүп жатканын баса белгиледи. Алар биринчи кезекте коңшу мамлекеттердин аймагынан террористтик жана экстремисттик максатта жарандардын өлкөгө киришин алдын алууга багытталган.
"Муну жакында Лелчицы районунан биздин өлкөнүн аймагына жардыргыч заттар менен мыйзамсыз кирүүгө аракет кылган эки украиналык жарандын кармалышы тастыктайт", — деди ал.