БИШКЕК, 4-мар. — Sputnik. Россиянын Коопсуздук кеңешинин төрагасынын орун басары Дмитрий Медведев немец офицерлеринин Крым көпүрөсүнө жасалчу чабуул боюнча сүйлөшүүсүнө комментарий берип жатып, Россия сабыр кылып карманып турарын, бирок эстен чыгарбасын билдирди.
РИА Новости муну саясатчы Жаштардын дүйнөлүк фестивалынын алкагында өткөн "Знание" коомунун "Знание. Первые" деп аталган марафонунда айтканын жазды.
"Албетте, биз сабыр кылып, карманып турабыз, анткен менен баары эсте болот", — деген Медведев.
Мындан сырткары, Россияны бардык нерсеге сабырдуулук менен карап башкарышарын жана "жогорку баш командачы буга кадыресе эле мамиле кыларын" кошумчалаган.
"Маселе, көйгөй ошондо жатат: кыязы, немецтер эч нерсени түшүнбөй, эч нерсени үйрөнбөгөн өңдүү. Эгерде бүгүнкү сүйлөшүүлөрдү эске албасак, эмнени байкоого болот? Россия менен бирөөнүн артында туруп алып согушуп, эл колдонгон жарандык объектилерибизди жок кылууну кадимкидей эле сүйлөшүп жатышат. Муну көмүскө жасашууда. Себеби жиги билинбеши керек. Бирок Улуу Ата Мекендик согуш учурунда биздин эмне кылганыбызды түшүнүүлөрү керек. Эстеринде болсун", — деген Медведев.
1-мартта "Россия сегодня" жана RT телеканалынын башкы редактору Маргарита Симоньян немец офицерлеринин "Крым көпүрөсүн кантип бомбалоону" талкуулап жаткан аудиосун жарыялаган. 19-февралдагы сүйлөшүүгө Бундесвердин Аскер-аба күчтөрүнүн (ААК) командачылыгынын операция жана машыгуулар боюнча бөлүмүнүн башчысы Франк Грефе, ААК инспектору Инго Герхартц, Фенске жана Фроштедте - аба операциялар борборунун кызматкерлери катышкан. Алар Украинага Taurus ракеталарын жөнөтүүнү жана украиналыктардын Крым көпүрөсүнө сокку уруусун кеп кылган. Мындан тышкары, аталган ракеталарды жеткирүү жолдорун, украиналык аскерлерди Крым көпүрөсүнө "кызыл чийинден" өтпөгүдөй кылып сокку жасоого үйрөтүүнү, ошондой эле жаңжалга түз катышпай четке чыга берүүнүн ыкмаларын талкуулашканын угууга болот.
ТИМдин расмий өкүлү Мария Захарова Москва Германиядан бул боюнча түшүндүмө талап кыларын айткан. Алардын коргоо министри Борис Писториус атайын маалымат жыйында аскерийлердин элге жайылып кеткен сүйлөшүүлөрүнүн бир катар фрагменттери "коомчулук таратууга болбой турган сырлар" экенин мойнуна алган. Анын айтымында, офицерлер план эмес, "ар кандай сценарийлерди" талкуулаган жана алардын сүйлөшүүсү Киевге канаттуу Taurus ракеталарын жөнөтүүгө жол ачып бере салбайт.