БИШКЕК, 1-мар. — Sputnik. Бишкек шаарынын аянты кеңейтилсе жаңы райондор түзүлбөйт. Бул тууралуу шаардык кеңештин коомдук талкууга коюлган токтомунда жазылган.
Маалым болгондой, жакында эле Бишкектин аянтын кеңейтип, Чүй облусуна караган аймактарды Бишкекке кошуу боюнча президенттин жарлыгы чыккан.
Ага ылайык, эми Аламүдүн районунун Аламүдүн, Маевка, Пригородное, Төмөнкү Ала-Арча, Лебединовка жана Көк-Жар айыл аймактары, Кара-Жыгач айыл аймагынын Анар-Бак конушу жана № 544, № 545, № 552 контурлары, Ак-Дөбө айыл аймагынын Алтын-Казык конушу, Таш-Дөбө айыл аймагынын Орто-Сай айылы, Ленин айыл аймагынын Мыкан айылы жана Ак-Жар, Нуркожо-Ата, Адилет конуштары, Сокулук районунун Орок жана Новопавловка айыл аймактары, Ат-Башы айыл аймагынын Ак-Жол айылынын № 177 контуру шаардын карамагында болмокчу.
Токтомдо шаарга карай турган айылдар, конуштар кайсы райондордун карамагына кирери да көрсөтүлгөн. Алар Бишкектин төрт районуна төмөнкүдөй бөлүштүрүлгөн:
Сокулук районунун Орок жана Новопавловка айыл аймактары Ленин районуна;
Аламүдүн районунун Көк-Жар айыл аймагы, Орто-Сай айылы, Анар-Бак конушу жана № 544, № 545, № 552 контурлары Октябрь районуна;
Маевка, Пригородное айыл аймактары, Алтын-Казык конушу, Ак-Жол айылынын № 177 контуру Биринчи май районуна;
Аламүдүн, Төмөнкү Ала-Арча, Лебединовка айыл аймактары, Мыкан айылы жана Ак-Жар, Нуркожо-Ата жана Адилет конуштары Свердлов районуна карамакчы.