"Биздин университет дүйнөдөгү беделдүү окуу жайлардын катарында. Азырынча Бишкек филиалында алты факультет иш алып барат. Анда студенттер маалыматтык технология, анын ичинде IT, роботтоштуруу тармагы, юриспруденция, экономика-менеджмент, биология-биотехника, психология жана чет тилдер боюнча билим алышат. Максатыбыз — биринчи кезекте Кыргызстанда таңсык болгон кесип ээлерин даярдап чыгаруу. Ошондуктан күндөн энергия алган адистерди, чыгыш, батыш тилдерин билген кесип ээлерин, жасалма интеллект боюнча адистерди окутуп жатабыз. Биздин студенттер 2-курсунан тарта эле илимге да аралашып, түрдүү долбоорлор боюнча гранттарды утуп, өздөрү продукция жасап чыгып сунуштай алышат. Бул максатта атайын лабораториялар, илимий клубдарды түзүп жатабыз. Окуу жайда азырынча жергиликтүү педагогдор окутуп келет, студент жогорку курска өткондө Казакстандагы башкы кеңсеге барып билим алуу мүмкүнчүлүгү бар. Мындан сырткары, университет 60тан ашык башка окуу жайлар менен академиялык мобилдүүлүк боюнча иштешет. Ошондой эле айрым предметтерди онлайн негизде Казакстандагы мугалимдерден окушат", — деди Шейшенов.