Кандуу тирешүү 30 жылга созулган. Вьетнамдык патриотторго ушул согушта расмий Москва, Пекин, Пхеньян жана Улан-Батор чоң жардам берген. Кандуу кармашка катышкан он миңден ашык советтик жоокердин арасында беш кыргызстандык аскер жана бир дипломат бар эле. Ракеталык күчтөрдүн жоокери Курсан Мадинов майданда алты айдан ашык салгылашып, көрсөткөн эрдиги үчүн СССРдин Өзгөчө күжүрмөндүк үчүн медалы менен сыйланган. Колумнист Алмаз Батилов Вьетнам согушунун 81 жаштагы ардагери менен маек курду.
Аксакал кызмат өтөгөн дивизион 1966-жылы атайын даярдыктан өтүп, Түндүк Вьетнамга жөнөтүлгөнүн айтып берди. Бул өлкөгө Мадинов жердеши Толубай Мадымаев экөө бир кеткен.
"Биздин милдет АКШнын аскердик учактарын атып түшүрүү эле. Америкалык учактар бомба таштаганда жер төлөгө жашынчубуз. Чыныгы достукту ушул кандуу тирешүүдө көрдүм, нечен тозоктон өттүк. Ата Мекенге аман келсем тамакты ылгабай жейм деп өзүмө ант берген элем. Вьетнамдыктар бизди бир тууганындай көрүп, акыркы тамагы менен бөлүшүп жешчү. Бул эл азаттыгы үчүн кашык каны калганча салгылашканына күбө болдук. 1966-жылы ноябрда СССРге кайттык. Полктошум Толубай Мадымаев экөөбүз армиядан чогуу демобилизация болдук. Аны менен 56 жылдан кийин жолуктум. Вьетнамдагы согуш бир топко чейин түшкө кирип жүрдү" — деди Мадинов.
Буга чейин Sputnik Курсан Мадиновдун куралдашы Толубай Мадымаев менен да баарлашып, согуштун азап-тозогун кеп кылган.