БИШКЕК, 17-фев. — Sputnik. Быйыл Бишкек шаарында бир катар эл аралык ири спорттук мелдештер өтөт. Бул тууралуу министрлер кабинетинин төрагасынын орун басары Эдил Байсалов аталган спорттук иш-чараларды даярдоо боюнча уюштуруу комитетинин отурумунда билдиргенин өкмөттөн кабарлашты.
Маалыматка ылайык, борбор калаада төмөнкүдөй эл аралык иш-чаралардын өтүшү күтүлүүдө:
21-26-февраль — өспүрүмдөр жана балдар арасында бильярд боюнча дүйнө чемпионаты;
26-февралдан 3-мартка чейин — бильярд боюнча дүйнө чемпионаты;
10-16-март — А тайпасынын үчүнчү дивизионунда хоккей боюнча дүйнө чемпионаты;
23-марттан 1-апрелге чейин — аялдар арасында хоккей боюнча дүйнө чемпионаты;
25-30-март — угуусу начар адамдар арасында таэквондо боюнча дүйнө чемпионаты;
11-16-апрель — грек-рим күрөшү, эркин күрөш жана кыз-келиндер күрөшү боюнча Азия чемпионаты;
19-21-апрель — грек-рим күрөшү, эркин күрөш жана кыз-келиндер күрөшү боюнча Парижде өтүүчү Олимпиада оюндарына Азия квалификациялык (лицензиялык) турнири.
Эдил Байсалов бул спорттук мелдештерди ийгиликтүү өткөрүү үчүн профилдик мамлекеттик органдарга тиешелүү чара көрүүнү тапшырды.