"Тигүүчүлөр орто эсеп менен айына 40 миң сом иштеп тапса, пенсиялык төгүмгө 800 сом которушат. Анын да жарымын иш берүүчү, жарымын өзү төлөйт. Ушул эле учурда мугалим, дарыгерлер 20 миң сомдук маянасынан 5000 сомго чукул каражат которушат. Бул жерде маалыматтын жетишсиздиги да роль ойноодо. Биз ири тигүү цехтеринин жетекчилери менен жолукканда кызматкерлердин санын жашырбай, Социалдык фондго болгон төлөмдөрдөн качпай иштөөгө чакырып келебиз. Керек болсо фабрикаларга барып түшүндүрүү иштерин жүргүзүп, маалымат берүүгө даярбыз. Иш берүүчүлөрдүн көпчүлүгү азыркысын ойлоп, каражатты өз чөнтөгүндө калтыргысы келет. Кабат үй куруп, кымбат автоунаа айдап тигүүчүлөрдүн эсебинен байып жатышпайбы. Муну түшүнүп турса да көптөгөн кызматкерлер "эртеңки куйруктан бүгүнкү өпкө артык" деген түшүнүк менен иш берүүчүнүн шарттарына макул болушат. Анан кийин пенсияга чыгарда бизге келип маалымат алышкан соң иш берүүчүсүн каргаганга чейин жеткендер болот. Андыктан мыйзамда жазылган милдеттерибизди аткарып, ар бир жаран өзүн жана мамлекетти сыйлап укугун да, милдетин да билиши шарт", — деди Жуматаева.