БИШКЕК, 12-фев. — Sputnik. Аксы окуяларында жабыркагандардын жөлөк пулу 3 700 сомдон 4 500 сомго көбөйтүлдү. Бул тууралуу Эмгек, социалдык камсыздоо жана миграция министрлигинин маалымат кызматы кабарлады.
Кеп курман болгондордун үй-бүлө мүчөлөрү менен жабыр тарткандарга берилчү социалдык төлөмдөр тууралуу болууда.
"Жөлөк пулдун өлчөмү 3 700 сомдон 4 500 сомго жогорулады. Кошумча жөлөк пулдун бул түрүн алчуларга 2023-жылдын 1-сентябрынан тартып кайра эсептөө жана төлөө жүргүзүлөт", — деп жазылат кабарда.
Жалал-Абад облусунун Аксы районунда 2002-жылы 17-мартта жергиликтүү эл нааразычылык акциясына чыккан. Алар камакка алынган Жогорку Кеңештин депутаты Азимбек Бекназаровду бошотуу жана Үзөңгү-Куушту Кытайга бербөө талабын коюшкан. Демонстранттарды токтотуу үчүн Боспиекте тартип коргоо кызматкерлери күч колдонуп, ок чыгарып, анын кесепетинен алты адам каза болуп, бир нечеси ур-токмокко алынган. Бул боюнча тартип коргоо органдары тарабынан атайын "Тайфун" операциясы уюштурулган.