БИШКЕК, 7-фев. — Sputnik. Москва шаарында өтүп жаткан эң ири эл аралык "ПродЭкспо-2024" аянтында Кыргызстандын Улуттук көргөзмөсү ачылды. Бул туурасында ТИМдин маалымат кызматынан кабарлашты.
"Кыргыз-орус ишкерлер кеңеши 9-февралга чейин эң ири эл аралык "ПродЭкспо-2024" аянтында Кыргызстандын Улуттук көргөзмөсүн ачты", — деп айтылган маалыматта.
Улуттук көргөзмөдө экспортко багытталган кыргызстандык беш компания, ал эми өнөр жай павильондорунда үч компания өзүнчө стенддерин ачкан.
Бул иш-чаранын алкагында Жаңгак өстүрүүчүлөр ассоциациясы жаңгак боюнча презентациясын тартуулаган. Кыргыз тарап менен Россиянын Соода-өнөр жай палатасынын ортосунда жаңгактарды жана экспортко багытталган башка продукцияларды РФтин рыногуна мындан ары жайылтуу боюнча эки тараптуу сүйлөшүүлөр болду. Андан сырткары, 2024-жылга биргелешкен кызматташуу пландарын сүйлөшкөн.
Презентацияга Кыргызстандын Россиядагы элчилигинин, РФтин Соода-өнөр жай палатасынын эл аралык иштер боюнча вице-президенти В.Падалко башында турган өкүлдөрү, эки өлкөнүн ишкерлер кеңештеринин теңтөрагалары Н.Атаканов жана В.Компанейщиков, Россиянын Чакан жана орто ишканаларды өнүктүрүү боюнча федералдык корпорациясынын башкармалыгынын мүчөсү Н. Банцекина катышкан.