БИШКЕК, 6-фев. — Sputnik. Эгерде Конгресстеги республикачылар АКШ Сенатынын улуттук коопсуздук максатындагы жана Киевге жардам берүү боюнча мыйзам долбоорун колдобой, Ак үйгө Дональд Трамптын президент болуп келишин күтүп отура берсе Украина жок болуп кетет. Бул туурасында Сенаттагы демократтардын лидери Чак Шумердин айтканын РИА Новости жазды.
"Спикер Жонсон баш болгон (Эл өкүлдөр палатасынын төрагасы — ред.) республикачылардын арбыны "мен президент болгуча күтө туралы, ага бир жылга жетпеген убакыт керек" деген Трамптан жаны чыгып коркушат. Украина жок болуп кетиши мүмкүн", — деген ал MSNBC телеканалынын эфиринде комментарий берип жатканда Республикалык партиянын мыйзам долбоорун сынга алып.
АКШнын Сенаты дүйшөмбү күнү чек араны кайтарууга акча бөлүү, Украинага, Израилге жардам көрсөтүү боюнча мыйзам долбоорун алып чыккан. Документте жалпы 118,28 миллиард доллар тууралуу айтылган. Анын 60,06 миллиарды Киевди колдоого каралмак. Чек араны кайтарып, бекемдөөгө үч эсе аз, тагыраагы, 20,2 миллиард доллар бөлүүнү сунушташкан. Президент Жозеф Байден мыйзам долбоорун колдой турганын айтып, аны мүмкүн болушунча эртерээк кабыл алууга чакырган.
Шумердин пикиринде, Трамптын келишин күтүп отура бергенде чек арада кырдаал алда канча начарлайт.
"Дональд Трамп башаламандыкты каалай турганын билдирди", — деп демократ-сенатор АКШ "тагдырды өзгөртчү тарыхый бурулуштун" босогосунда турганын белгилеген.
Сунушталган мыйзам долбоору республикачыл саясатчылардын катуу сынын жараткан. АКШнын мурдагы президенти Трамптын сенат сунуштаган бул "шумдуктуу" документке кемпай же радикадуу солчул демократ гана добуш бериши мүмкүндүгүн айткан жайы бар.
АКШнын Өкүлдөр палатасынын спикери Майк Жонсондун айтымында, Киев менен Израилге жардамды бириктирип жана Штаттардын өз чек арасын коргоо боюнча мыйзам долбоору "күтүлгөндөн да начар чыккандыктан" колдоого алынбайт.